ޒިކުރާ އިންޓަނޭޝަނަލް ކޮލެޖުގެ ޖުލައި އިންޓޭކުގެ ކިޔެވުން ރަސްމީކޮށް ފަށައިފިއެވެ. މި އިންޓޭކުގައި ތަފާތު ދާއިރާތަކުގެ ކޯސްތަކުގެ ކިޔެވުން ފެށުމުގެ ކުރިން، ދަރިވަރުން މާޙައުލަށް އަހުލުވެރިކުރުވުމަށްޓަކައި އޮރިއެންޓޭޝަނެއް ބޭއްވުނެވެ. މި މަހުގެ 16 އަދި 17 ވަނަ ދުވަހު ބޭއްވުނު މި އޮރިއެންޓޭޝަނުގައި، ޒިކުރާ އިންޓަނޭޝަނަލް ކޮލެޖުގެ މާލެ އަދި ފުވައްމުލަކުގައި ކެމްޕަހުގައި ކިޔަވައި ދަރިވަރުންގެ އިތުރަށް އޮންލައިންކޮށް ކިޔަވާ ދަރިވަރުންނަށް ކޮލެޖުގެ ސިޔާސަތުތަކާއި، ފެކަލްޓީތަކުގެ މަޢުލޫމާތާއި، އެކަޑެމިކް ކަންކަމާ ގުޅޭ މުހިންމު މަޢުލޫމާތު ފޯރުކޮށްދެވުނެވެ. މީގެ އިތުރުން، އޮންލައިންކޮށް ކިޔަވައިދިނުމުގެ ނިޒާމާ ބެހޭ ތަފްޞީލީ މަޢުލޫމާތުވެސް ހިއްސާކުރެވުނެވެ. ޖުލައި އިންޓޭކުގައި ލެވެލް 3 ގެ ސެޓްފިކެޓުން ފެށިގެން މާސްޓަރސް ޑިގްރީއާ ހަމައަށް އެކިދާއިރާ ތަކުން ޖުމްލަ 20 ކޯހެއްގެ ކިޔެވުން ފެށުނެވެ. މީގެތެރެއިން އެންމެ ޚާއްޞަކޮށް ފާހަގަކޮށްލެވެނީ މި ސެމެސްޓަރުގައި އަލަށް ތަޢާރަފުކުރެވުނު މާސްޓަރ އޮފް އެޑިޔުކޭޝަން މެނޭޖްމަންޓް އެންޑް ލީޑަރޝިޕް ކޯހެވެ.