ބެޗެލަރ އޮފް އިމާމްޝިޕް އެންޑް އިސްލާމިކް ލީޑަރޝިޕް ޕްރޮގްރާމަކީ މިސްކިތްތަކުގައި ނަމާދުކުރާނެ ޤާބިލު އިމާމުންނާއި ޚުޠުބާކިޔާނެ ޚަޠީބުންނާއި ޖަމާޢަތްތެރިން ތަމްރީނުކުރުމާއި، ދީނީގޮތުންނާއި އިޖްތިމާޢީގޮތުން ހެޔޮ ރަނގަޅު ޚިދުމަތްތަކެއް ކުރާނެ ޤާބިލުމީހުން އުފެއްދުމެވެ. އަދި މިހާރުވެސް އިމާމްކަން ކުރަމުންދާ އިމާމުންނާއި ޚުޠުބާ ކިޔާ ޚަޠީބުންނާއި ޖަމާޢަތްތެރިން ޢިލްމީގޮތުންނާއި ޢަމަލީގޮތުން އިތުރަށް ތަމްރީނުކުރުމެވެ. އަދި މި ޕްރޮގްރާމަކީ އިސްލާމް މުދައްރިސްކަމުގެ ދާއިރާއިންނާއި، ޤުރްއާން މުދައްރިސްކަމުގެ ދާއިރާއިން ކުރިއަށް ދިޔުމަށް ބޭނުންވާ ދަރިވަރުންނަށްވެސް ފަސޭހަކޮށްދޭނެ ޕްރޮގްރާމެކެވެ. މި ޕްރޮގްރާމް ފަރުމާކުރެވިފައިވަނީ މޯލްޑިވްސް ކޮލިފިކޭޝަން އޮތޯރިޓީން ކަނޑައަޅާފައިވާ ޤުރްއާނާބެހޭ ކޯސްތައް ފޭސް ޓް ފޭސްކޮށް، އަދި އީ-ލާނިންގ މޮޑަލިޓީގައި ހިންގުމަށް ކަނޑައަޅާފައިވާ ޤަވާޢިދާ އެއްގޮތަށެވެ. ލެކްޗަރގެ އުޞޫލުންނާއި ޓިއުޓޯރިއަލް މަސައްކަތްތަކާއި، އުނގަންނައިދިނުމުގެ ޒަމާނީ ތަފާތު އެކި ވަސީލަތްތައް ބޭނުންކޮށްގެން ޕްރޮގްރާމްގެ ޢިލްމާއި ތަމްރީނު އެންމެ ފުރިހަމައަށް ދަރިވަރުންނަށް ފޯރުކޮށްދެވުނުތޯ ކަށަވަރުކުރެވޭނެއެވެ.